काठमाडौँ, ५ असोज । नेपालमा पछिल्लो २४ घन्टाको अवधिमा १ हजार ३३० जना कोरोना भाइरस संक्रमित थपिएका छन् भने ५ जनाको मृत्यु भएको छ ।
पछिल्लो २४ घन्टामा देशभर ९ हजार ६२६ आरटी पिसिआर र ३ हजार ९९६ एन्टिजेन गरी कुल १३ हजार ६२२ जनामा परीक्षण गरिएकोमा १ हजार ३३० जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।
हाल देशभर २१ हजार ५२४ जना संक्रिय संक्रमित छन् । संक्रमितहरूमध्ये २० हजार १६४ जना होम आइसोलेसनमा, १ हजार ३६० संस्थागत आइसोलेसनमा र २५० जना क्वारेन्टिनमा रहेका छन् ।
यस्तै मुलुकभरका विभिन्न अस्पतलाको आइसियूमा ३३५ जना र भेन्टिलेटरमा १०७ जना उपचाररत छन् ।
मन्त्रालयकाअनुसार मंगलबार देशभरबाट १ हजार ८३० जना कोरोना संक्रमणमुक्त भएर फर्किएका छन् ।
